مساء الخير علي أحبابي
مساء الخير عليكي يا مصر ياحبيبتي
أنا لسة ماسكة الفرشة وبأرسم لك
أحلامي ليكي يا حبيبتي
بأحلم بشوارع حلوة نظيفة ومرصوفة من غير غش
ومرور متنظم
ورصيف حافظ حق مواطن معاق ومسن
يعني الكود الهندسي متنفذ.
رصيف يساع كل اللي ماشي
بأحلم بإنارة لكل شوارعنا بطاقة شمسية
… حتريحنا وما تكلفناش
بأحلم بالمية النقية توصل لكل مواطن
وصرف مش طافح وواصل خدمته لكل مكان
مافيش حرمان
بأحلم برجال وستات شايلينك علي كفوف الراحة
دول هما ولادك الشرفاء
في محليات منظومتها ماشية بخطة استراتيجية متحدد فيها وقت ومنهج وآلية
وكمان أولها تحديد المسئولية
مسئولية متعلقة في رقبتهم
مش هما ولادك
طبعا دول المخلصين الأوفياء
خلاص مافيش خاين ولا فاسد ولا متكاسل
بلادنا شايفاها قدامي ناجحة وطالعة لفوق
بتتقدم يعني مش حيكون فيه أمية
..والكل فيها متعلم
والا البطالة خلاص مافيش
رجال الأعمال فتحوا مصانع ومشاريع حقيقية
استوعبت كل الشباب
ماهو التعليم اصبح منظومة مختلفة عن كل اللي فات
تأهيل وتدريب وتطبيق وخريج متأهل صح من رجال تعليم بيحبوا بلادهم
ومناهج مدروسة علي أعلي نظام تعليم مش تلقين
وصحة أولادنا قوية
وطفولة سعيدة وولاد علي حسن الأخلاق متربية
ومشروعات تنموية للمرأة الريفية
ومراكز تكوين وتأهيل مهني وصحي متطورة
بتقدم لكل معاق خدمة وفرصة عمل تكفله حياة كريمة تسعده
وسياسات وفق رؤية ورسالة وأهداف واضحة لميلاد جيل متميز من أولادنا وأحفادنا
ايوة دي أحلامي اللي بأرسمها في لوحاتي
عليها علمك وهرمك يا حبيبتي
وده جزء منها والباقي جاي لسة وبالفرشة لسة حأكملها
مبسوطة مني يا حبيبتي
مبسوطة حقيقي
ماأنا بنتك وواقفة وشغالة ومواصلة في الواقع عملي
علشان راح أحقق حلمي وحلمك يا حبيبتي
إرسال تعليق
اترك تعليق حول الخبر